ندي : ماما .. هوا ممكن تكلمي حد ميردوش عليكي مع انكوا كنتوا صحاب .. وانتي مزعلتهوش؟؟
ماما : ليه بتقولى كده يا حبيبتي ؟
ندي : (تنظر الي السماء وتفرد ايدها علي الاخر كأنها عاوزة تطول السما وتشاور ) : شايفة ياماما النجمة اللى فوق دي؟
ماما ( تبتسم وهيا تنظر الي السماء ) : انهي فيهم يا ندي يا حبيتى .. السماء مليانة نجوم
ندي : ( تتزمر وتعترض ) : لا مش مليانة نجوم ولا حاجة .. دا كلهم صغيرين ومش باينين .. اهي ياماما ..ركزى .. النجمة الكبيرة اللى بتلمع دي
ماما : اه اه .. شفتها ... مالها
ندي : اهي النجمة دي بقى صحبتي أوى .. بحبها أوى يا ماما .. بس بكلمها مش عارفة ليه مش بترد عليا .. مع أنها كانت بتكلمنى كتير زمان .. طول الليل
ماما : طب وكانت بتقولك ايه ؟؟
ندي : كنا بتقعد تلعب معايا .. وتغنيلي .. وأنا كنت بقعد احكيلها حواديت
ماما : يمكن شافت لها صاحبة غيرك ... تلاقيكي زعلتيها .. منا عارفاكي
ندي : لا والله ياماما .. دا انا كنت بحبها أوى .. وعمري مش زعلتها ... انتى عارفة ياماما انا عرفتها ازاى؟؟
ماما (مازالت على شفتيها الابتسامة ) : ازاى؟؟
ندي : كنت كل ما أبص للسما الاقيها بتندهلى .. ولما كنا بنروح عند البحر كنت بشوفها هناك .. ولما بنروح عند ستو بتيجي معانا .. ولما كنت بنام كانت بتطلعلى فى الحلم .. بس دلوقتى مش بتكلمني
ماما : هيا النجوم بتتكلم يا ندي؟؟
ندي : ايوة ياماما بتتكلم .. اهي عندك اسأليها يمكن ترد عليكي .. وقوليلها ياماما ترجع صحبتي تانى وتنزل تلعب معايا زى زمان
ماما ( تاخد ندى على حجرها ) : النجوم مبتتكلمش ومبتغنيش
ندي: لا يا ماما بتتكلم .. وبتلعب وبتغنى كمان
ماما : دا فى احلامك بس يا حبيبتى .. فى الحقيقة النجمة مينفعش تنزل على الارض ...النجوم مينفعش تسيب السما يا حبيبتى .. النجوم مكانها فوق وبس .. عشان كل الاطفال القطاقيط اللى زيك كده يشوفوها
ندي : ( يحتنق صوتها بالدموع ) يعنى هيا ليها صحاب تانيين وبتنزل تلعب معاهم؟؟
ماما : طبعا يا حبيبتى
ندي : طب خلاص ياماما . اطلع لها أنا .. اجيبها واخبيها فى الشنطة بتاعتى عشان تبقى بتاعتي أنا وبس
ماما : برده مينفعش .. النجوم مكانها فى السما .. وانتى مكانك فى الارض وعمرنا ما هنتقابل معاهم
ندي : بس النجمة دى بتاعتي ..أنا وبس
ماما : النجمة دى بتاعتنا كلنا .. ومفيش داعى تقعدى تقولى الكلام دا علشان النجمة متزعلش منك ... وتمشى من فوق بيتنا
ندي : كمان تزعل .. تزعل منى عشان بحبها؟؟؟
تنزل ندى من على حجر ماما وتجرى الى حجرتها وهيا تبكى .. تدفن رأسها فى وسادتها وتنظر الى الشباك حيث توجد نجمتها تتلألأ وتنظر اليها فى صمت
تحــــيــــاتـي